如果命運有得揀，又邊會有人想犯法？

最近有單新聞，話品學兼優少女賣翻版手機殼罪成候刑。十幾歲女學生屋企靠綜緩生活，我見猶憐，令人反思香港執法機關以至律政司處事係咪太過不近人情。

當然毒果新聞渲染成風不在話下，但令我耿耿於懷嘅從來都係犯案者本身值得可憐之處。如果命運有得揀，冇人會願意犯法而被判罪。本身被審判嘅人都係社會上嘅弱者，就算權貴下獄，都係佢失勢嘅時候。當年讀刑法，略讀過好多殺人放火嘅案件。每一個人犯法，都有其可憐之處，就算係殺人放火，好多時都係佢一時鬼迷心竅導致，又或者佢反社會人格，不過天生有性格缺陷又有得揀架咩。當年每讀到 mens rea （「犯罪意識」，又或者可譯做「惡念」）嘅概念，就覺得周身唔自在，究竟法律憑咩去話一個人心存惡念，所以理應受罰？撫心自問如果自己身處罪犯同樣嘅情境，我會唔會以身試法，真係好難講。普通法講 mens rea，話係懲罰奸惡。但究竟我哋係定係懲罰定係不幸嘅人，我真係唔知。我唔係唔相信自由意志，唔係唔相信人要為自己嘅行為負責，但人總有意志薄弱嘅時候，總有不能自控嘅時候，例如大家慣咗上臉書，未必可以輕易控制自己唔用臉書一樣。

講得有啲遠，總之罪犯之流，大多數都係草根出身，背後多悲情故事，點止係一個所謂品學兼優嘅女學生。愛就係選擇，選擇就係捨棄。一個女學生賣賣翻版手機殼搞到要打官司留案底固然可憐，但每日喺法院出出入入嘅人，大部份都有佢哋嘅苦衷，有佢哋嘅故事，有佢哋嘅無奈。

然而，一個所謂先進社會嘅齒輪，一個以法治為本嘅社會，就係要將呢啲扣人心弦嘅人情，逐一磨蝕。正義女神蒙住眼作出審判，本身就帶有幾分不近人情嘅意味。我哋只可以慨嘆點解個社會變成噉，但難道你又肯喺法律入面明文寫住「品學兼優嘅女學生初犯小過失唔准起訴」咩？到最後，大家都只會猶疑，但又唔肯放棄法治，放棄「法律面前人人平等」嘅假象。所以嘈完幾句，發泄完之後，大家都無奈地好似女神噉樣，閉起雙眼，冇眼睇。